अमरावती शहर, जिल्ह्यासह परिसरातील जिल्ह्यांतील दुर्धर आजारांच्या रुग्णांवर तसेच इतरही आजारांवर शहरातील सुपर स्पेशालिटी रुग्णालयात उपचार केले जातात. दरम्यान, मागील वर्षभरात या ठिकाणी तब्बल साडेपाच हजार शस्त्रक्रिया झाल्या आहेत. यासोबतच रुग्णांना शासकिय योजनेचा लाभ मिळवून देत उपचार दिल्यामुळे सर्वच घटकातील रुग्णांना फायदा झाला आहे. दरम्यान शासनाच्या ज्योतिराव फुले जन आरोग्य योजनेअंतर्गत सुपर स्पेशालिटी रुग्णालयाने केलेले कार्य लक्षात घेता राज्यातून दुसरा तर विदर्भातून पहिला क्रमांक मिळाला आहे. त्यासाठी नुकताच प्रभारी जिल्हाधिकाऱ्यांच्या हस्ते ‘सुपर’च्या अधिकाऱ्यांना सन्मानित करण्यात आले. शासकीय रुग्णालयास हित अनेक खासगी रुग्णालय देखील या योजनेत समाविष्ट आहेत. राज्यात ४९२ रुग्णालयात ही योजना सुरू आहे. या माध्यमातून रुग्णाचे उपचार व शस्त्रक्रिया मोफत करण्यात येतात. मागील वर्षात शहरातील विभागीय संदर्भ सेवा रुग्णालयात (सुपर स्पेशालिटी) एकूण साडेपाच हजारांवर शस्त्रक्रिया झाल्या आहेत. या योजनेअंतर्गत रूग्नांना मोफत सेवा पुरवण्यात येते.
यात विविध प्रकारच्या शस्त्रक्रिया व उपचार करण्यात येतात. यामध्ये विदर्भात सर्वाधिक रुग्णांच्या शस्त्रक्रिया व उपचार मोबदल्यात क्षतीपुरतीचा लाभ अमरावतीच्या विभागीय संदर्भ सेवा रुग्णालयाला (सुपर स्पेशालिटी) मिळाला. म्हणूनच शासनाच्या वतीने त्यांना या उत्कृष्ट कामाकरिता २६ जानेवारीला गौरवले आहे. प्रभारी जिल्हाधिकारी तथा मुख्य कार्यपालन अधिकारी अविष्यांत पंडा यांनी रुग्णालयाच्या वैद्यकीय समन्वयक डॉ. पायल रोकडे व डॉ. दिवयानी मुंडाणे यांना प्रमाणपत्र देऊन सन्मानित केले. यावेळी अप्पर जिल्हाधिकारी राम सिद्ध भट्टी प्रामुख्याने उपस्थित होते. सुपर स्पेशालिटी रुग्णालयात मागील वर्षभरात विवीध आजारांच्या एकूण साडेपाच हजार शस्त्रक्रिया झाल्या असून, त्यामध्ये लहान स्वरूपाच्या ४ हजार, मोठ्या स्वरूपाच्या १ हजार आणि अतिशय क्लिष्ट स्वरूपाच्या पाचशे शस्त्रक्रिया झालेल्या आहेत.
सुपर मध्ये प्रामुख्याने लहान बालकांवर विशेष जन्मत: असलेल्या आजारांवर शस्त्रक्रिया केली जाते. तसेच मुतखड्यावरील लेझर व शस्त्रक्रियेद्वारे उपचार, किडनी संबंधी आजारांवर उपचार व शस्त्रक्रिया, हृदयाशी संबधी उपचार तसेच प्लॅस्टिक सर्जरी केली जाते. या सर्व शस्त्रक्रियेसाठी येणाऱ्या रुग्णांना शासकिय योजनेचा लाभ देणे, त्यासाठी रुग्णांना काही अडचण आल्यास आवश्यक ती सर्व मदत करण्यात येत आहे. रुग्णालयाने केलेल्या या कामगिरीसाठी वैद्यकीय अधीक्षक डॉ. अमोल नरोटे, विशेष कार्य अधिकारी डॉ. नीलेश पाचबुद्धा, दिगंबर इंगोले, बिपिन भगत, कुंदन मातकर, मंजूषा गहूकर, मेघा पांडे, ललित तायडे, चेतन मुळे, अक्षय कावळे, भूपेंद्र जेवडे, प्रीतम चक्रे या कर्मचाऱ्यांचे तसेच रुग्णालयातील सर्व वैद्यकीय अधिकारी, कर्मचारी यांचे सहकार्य लाभले.
