बुलढाणा : बुलढाणा जिल्ह्यात बाप-लेकीच्या नात्याला काळिमा फासणारी एक धक्कादायक घटना घडली आहे. एका १६ वर्षीय मुलीवर तिच्याच वडिलांनी अत्याचार करत तिला गर्भवती केल्याची संतापजनक घटना उघडकीस आली आहे. ही घटना चिखली तालुक्यातील एका गावात घडली. या प्रकरणी चिखली पोलिसांनी आरोपी बापाला अटक केली आहे. आरोपीला न्यायालयात हजर केले असता त्याला तीन दिवसांची पोलीस कोठडी सुनावण्यात आली आहे.
चिखलीपासून जवळ असलेल्या एका खेडेगावातील एका १६ वर्षीय अल्पवयीन मुलीच्या पोटात दुखत असल्यामुळे तिला शहरातील एका खाजगी दवाखान्यात नेण्यात आले. डॉक्टरांनी पीडित अल्पवयीन मुलीची तपासणी केली असता ती चार महिन्यांची गरोदर असल्याचे निदान समोर आले. ही बाब लक्षात येताच मुलगी आणि आई या दोघींनीही कुणालाच काही सांगण्यास नकार दिला. “मला फक्त माझ्या मुलीचा उपचार करायचा आहे. आमचे घरचे प्रकरण आहे, आम्ही घरातच मिटवणार आहोत”, असं सदर मुलीच्या आईने सांगितले.
त्यानंतर, डॉक्टरांनी “आम्हाला पोलिसांत माहिती द्यावीच लागते”, असं सांगत डॉक्टरांनी याबाबत पोलिसांना माहिती दिली. पोलिसांनी या प्रकरणी पीडित अल्पवयीन मुलीची आणि तिच्या आईची चौकशी केली. त्या दोघींनीही तक्रार देण्यास नकार दिला. समाजात बदनामी होण्याच्या धाकाने या माय-लेकीनं हा सर्व प्रकार लपवला होता.
दरम्यान, तक्रार देण्यास कुणीच पुढे येत नसल्याने पोलिसांनी स्वतःच फिर्यादी होत या प्रकरणी आरोपी पित्याविरुद्ध कलम ३७६ आणि पोक्सोनुसार गुन्हा दाखल करुन आरोपीस अटक केली. सदर आरोपीस न्यायालयात हजर केले असता न्यायालयाने तीन दिवसांची पोलीस कोठडी सुनावली आहे. जन्मदात्या पित्यानेच आपल्या अल्पवयीन मुलीचे आयुष्य नासवले आहे. नात्याला काळीमा फासणारी आणि बाप या शब्दाला डाग लावणारी ही दुर्दैवी आणि संतापजनक घटना आहे.
