नागपूर: हिंदुहृदयसम्राट बाळासाहेब ठाकरे समृद्धी महामार्ग सामान्य नागरिकांसाठी खुला करण्यात आल्यानंतर चार महिन्यांनंतर ई-वेवर मृत्यू होणाऱ्या सर्वात असुरक्षित वन्य प्रजातींपैकी एक म्हणजे माकडं आहेत. अशीच एक घटना पुन्हा समृद्धी महामार्गावर घडली. मात्र, यात एका माकडिणीचा मृत्यू झाला तर तिच्या पिलाला मात्र एका रुग्णवाहिका चालकाने जीवनदान दिलं आहे.
शनिवारी सकाळी रुग्णवाहिका चालक किरण अशोक सुर्यवंशी (वय ४२) आणि त्याचा नाशिक येथील मित्र विक्की पठाण (वय ४४) हे ओदिशाहून परतत असताना महामार्गावरील वर्धा टोल चेकपोस्टजवळ त्यांना एक भावनिक नाट्य पाहायला मिळालं. जिथे एका माकडिणीचे पिल्लू रस्त्याच्या धडकेत गंभीर जखमी झालेल्या त्याच्या आईला जागे करण्याचा प्रयत्न करत होता.
ओदिशा वरुन नाशिकला जाणाऱ्या या रुग्णवाहिका चालक सूर्यवंशी यांनी हे सारं पाहिलं. “सूर्यवंशी म्हणाले की, ओदिशाला १,४५० किमी चालवल्यानंतर आणि नाशिकला परत आल्यानंतर मी थकलो होतो आणि मला झोप येत होती. मी एका टोल बुथजवळ वाहन थांबवले आणि जरा वेळ आराम करत होतो. सकाळी ७ च्या सुमारास मला जाग आली. तेव्हा मला विरुद्ध दिशेनं एक भरधाव कार येताना दिसली. आम्ही पलीकडे गेलो आणि पाहिले की माकडाचं पिल्लू त्याच्या आईच्या छातीला चिकटून तिला उठवण्याचा प्रयत्न करत होता. त्या पिलाला उभं देखील राहता येत नव्हतं. आई काहीच प्रतिसाद देत नसल्याने हे पिल्लू कासाविस झालं होतं.”
“माकडिणीची प्रकृती गंभीर होत चालली होती. मी वेळ न घालवता बाळाला उचलले आणि आमच्या रुग्णवाहिकेत असलेल्या रॅपरमध्ये त्याला ठेवले. आम्ही टोल बूथवरून वन कर्मचाऱ्यांचे नंबर मिळवले आणि त्यांना फोन केला. जेव्हा दुसऱ्या टोल बुथवर पोहोचलो तेव्हा वनपालांनी माकड आणि बाळाला पिपरी (मेघे) येथील पीपल फॉर अॅनिमलस (पीएफए) संचालित ‘करुणाश्रमा’मध्ये हलवण्याचा सल्ला दिला. त्यानंतर माकडिण आणि बाळाला टोल बुथपासून ३-४ किमी अंतरावर असलेल्या पीएफए केंद्रात नेले”, अशी माहिती सूर्यवंशी यांनी दिली.
पीएफए सदस्य कौस्तुभ गावंडे म्हणाले, “माकडिणीचा प्रकृती गंभीर होती आणि उपचारादरम्यान तिचा मृत्यू झाला. बाळाला खरचटलही नव्हतं, परंतु त्याची आई नाही, याचा त्याला धक्का बसला. वन्यजीव पशुवैद्य डॉ. संदीप जोगे हे या पिलावर भावनिक उपचार करत आहेत”
