बुलडाणा : भारतात वयोवृद्ध आणि लहान मुलं हरवल्याच्या अनेक धक्कादायक घटना आपण पाहत असतो. काही प्रकरणांमध्ये व्यक्तीचा शोध लागतो, पण काही मात्र कधीच सापडत नाहीत. पण बुलडाण्यातल्या एका आरपीएफ जवानाने असं काही काम केली की त्याच्या कामाचं तुम्हीही कौतूक कराल. आंध्र प्रदेशमधील एक ८० वर्षीय वृद्ध महिला प्रवासादरम्यान चुकून शेगाव इथं रेल्वे स्थानकावर उतरली. तिचा आरपीएफ पोलिसांनी शोध घेऊन फक्त दोन तासात तिच्या परिवाराच्या स्वाधीन केल्याची घटना शेगाव रेल्वे स्थानकावर घडली.
आंध्र प्रदेशमधील वृद्ध महिला मोरा राधा वय वर्ष ८० वर्ष. ही मुलगा मोरा सत्यनारायणसोबत वरंगलपासून सुरतपर्यंत ट्रेन क्रमांक १२ ६५६ नवजीवन एक्सप्रेसने प्रवास करत असताना ही गाडी शेगाव रेल्वे स्थानकावर उभी राहिली. आजीला वाटलं सुरत स्टेशन आलं आणि त्या गोंधळून शेगावलाच उतरल्या. थोड्यावेळाने आपली आई दिसत नसल्याचं तरुणाच्या लक्षात आलं. म्हणून मुलाने तातडीने आरपीएफला सूचना दिली.
यावरून प्रधान आरक्षक रंजन तेलंग व गावंडे यांनी आजीबाईचा शोध घेतला असता. त्या शेगाव प्लॅटफॉर्म क्रमांक २ वर आढळून आल्यामुळे आजीच्या मुलाला तुमची आई शेगावला असल्याचे समजताच तो मलकापूर स्टेशनवरून शेगावला पोहोचला. आईला बघून तो आनंदित झाला. यानंतर आजीला मुलाकडे सुपूर्त करण्यात आलं. फक्त २ तासांत आई भेटल्याने सदर मुलगा व आई दोन्ही आनंदी झाले.
खरंतर, प्रवास करताना आणि तेही सोबत वृद्ध व्यक्ती असताना फार काळजी घ्यावी लागते. त्यातच आपण मुख्यतः रेल्वेने प्रवास करत असतो तर अधिक काळजी घ्यावी लागते. कारण, एखादी व्यक्ती हरवली तर तिचा शोध घेणं फार अवघड होऊन बसतं. पण ज्या सूचकतेने मुलगा मोरा सत्यनारायण याने क्षणाचाही विलंब न करता रेल्वे सुरक्षा यंत्रणेसोबत संपर्क साधत शेगावपासून फक्त २ स्टेशन पुढे असलेल्या मलकापूर रेल्वे स्टेशनवरून संपर्क साधत आपल्या आजी हरवलीची सूचना दिली.
तिचं सविस्तर वर्णन सांगितलं. रेल्वे सुरक्षा कर्मचारी आणि अधिकाऱ्यांच्या परिश्रमाने तो आपल्या आजीपर्यंत पोहोचलादेखील. यामुळे त्याचे सर्व स्तरातून अभिनंदन होत आहे. यावरून घटना घडल्यानंतर धांदल न उडता प्रशासनाला कसं सहकार्य करता येईल व आपण स्थिर राहून मार्ग कसा काढता येईल, हे या यावरून दिसून येतं असं म्हटलं तर वावगं ठरणार नाही.
