नागपूर : वर्धा मार्गावरील खापरी नाका परिसरात पाचवर्षीय मुलीसमोरच मालवाहू वाहनाने वडिलाला चिरडून ठार केले. ही हृदयद्रावक घटना बुधवारी सायंकाळी ५.३० वाजताच्या सुमारास घडली. अतुल भागवत बांते (वय ३१, रा. खापरी पुर्नवसन) असे मृतकाचे नाव आहे. ते गेटवेल हॉस्पिटलमध्ये ऑपरेटर होते.
पोलिसांकडून मिळालेल्या माहितीनुसार, अतुल यांच्या पत्नी सीमा या केअर हॉस्पिटलमध्ये परिचारिका आहेत. त्यांना गुर्वी (वय ५) जान्हवी (वय १८ महिने) या दोन मुली आहेत. प्रकृती खालावल्याने बुधवारी अतुल हे हॉस्पिटलमध्ये गेले नाहीत. सीमा या हॉस्पिटलमध्ये गेल्या. सायंकाळी ५ वाजताच्या सुमारास त्या ‘आपली बस’ने खापरीला यायला निघाल्या. त्यांना घेण्यासाठी अतुल हे गुर्वीसह दुचाकीने खापरी नाका येथे आले. तेथे वाहन पार्क केले. गुर्वीला वाहनावरच बसवून ठेवले. अतुल रस्ता पार करताना मालवाहू वाहनाने त्यांना धडक दिली. अपघातानंतर चालक मालवाहू वाहनासह पसार झाला. नागरिक जमा झाले. सीमा घटनास्थळावर गेल्या असता अतुल त्यांना जखमी अवस्थेत पडलेले दिसले. त्यांनी हंबरडा फोडला. दरम्यान, पोलिसांचे वाहन तेथून जात होते. पोलिसांनी जखमी अतुल यांना खासगी हॉस्पिटलमध्ये दाखल केले. डॉक्टरांनी तपासून त्यांना मृत घोषित केले. सीमा यांचे लक्ष मुलीकडे गेले. त्यांनी मुलीला जवळ घेत हॉस्पिटल गाठले व नातेवाइकांना माहिती दिली. पंचनामा करून पोलिसांनी मृतदेह मेडिकलकडे रवाना केला. याप्रकरणी बेलतरोडी पोलिसांनी प्राणांतिक अपघाताचा गुन्हा दाखल करून मालवाहू वाहनचालकाचा शोध सुरू केला आहे.
