अमरावतीच्या पंचवटी चौकात एका तरुणाने स्वतःवर पेट्रोल टाकून पेटवून घेतल्याची धक्कादायक घटना समोर आली आहे. भररस्त्यात तरुणाने स्वत:ला संपवण्याचा प्रयत्न केलाय. यावेळी नागरिकांच्या सतर्कतेने या तरुणाचे प्राण वाचले आहेत. आगीवर नियंत्रण मिळवताच स्थानिकांनी तरुणाला रुग्णालयात दाखल केले.
आगीमुळे तरुण 60 टक्के जळल्याची माहिती डॉक्टरांनी दिली आहे. तसेच सध्या त्याची प्रकृती गंभीर आहे. प्रविण देशमुख (35 रा.लक्ष्मी नगर अमरावती) असं जाळून घेतलेल्या तरुणाचं नाव असल्याची प्राथमिक माहिती समोर आली आहे. तरुणावर सध्या अमरावती जिल्हा सामन्य रुग्णालयात उपचार सुरू असून पुढील तपास पोलीस करत आहेत.
या तरुणाने स्वतःला जाळून का घेतलं याचं कारण अद्याप कळू शकलेलं नाही. युवकाने स्वत:ला जाळून घेतले तेव्हा त्यावेळी रस्त्यावर अनेक जण उभे होते. यातील अनेकांनी ही थरारक घटना आपल्या फोनमध्ये कैद केली आहे. तसेच घटनेचा व्हिडीओ सोशल मीडियावर पोस्ट केला आहे. सध्या हा व्हिडीओ देखील जोरदार व्हायरल होत आहे.
भर रस्त्यात स्वत:ला अशा पद्धतीने पेटवून घेणारा हा तरुण नेमका कोण आहे. आत्महत्या करण्यासाठी त्याला कोणी प्रवृत्त केले होते का? असे अनेक प्रश्न या घटनेमुळे निर्माण झालेत. पोलिसांनी या प्रकरणी तपास सुरू केलाय. सदर तरुणाच्या नातेवाईकांची आणि परिसरातील अन्य व्यक्तींची चौकशी सुरू आहे.
